Cette page a été validée par deux contributeurs.
Li sains dist : « Quel lei aorées
En dementré que vivées ? »
Jobel dist : « Apolin sans faille ;
Mais tel deus ne vaut une paille.
Por ce avons soffert grant peine
Et torment grant en fernal regne.
Del feu d’infer fors nos getas,
Quant tu si nos recossitas ;
Or te prions comunement,
Batise nos hastivement.
Qu’il ne nos covieigne raler
Et au feu d’infer ravaler. »
Ileuc n’ot aige apareillée
Qui fust ni doce ni salée.
Li sains fist en la terre crois,
Donc saili fontaine à grant frois ;
Lors les batia, si les fist liés ;
Lavé furent de lor pechés.
Li sains lor dist : Ains que je aille,
En paradis irès sans faille.
