10 AENEIDOS LIBER III. v. 137.
Terra procul vastis colitur Mavortia campis,
Thraces arant, acri quondam regnata Lycurgo ;
Hospitium antiquum Trojæ, sociique Penates,
Dum fortuna fuit. Feror huc, et littore curvo
Mœnia prima loco, fatis ingressus iniquis :
Æneadasque meo nomen de nomine fingo.
Sacra Dionaeae matri divisque ferebam
Auspicibus cœptcrum operum ; superoque nitentem
Cœlicolûm regi mactabam in littore taurum.
Forte fuit juxtà tumulus, quo cornea summo
Virgulta, et densis hastilibus horrida myrtus.
Accessi ; viridemque ab humo convellere silvam
Conatus, ramis tegerem ut frondentibus aras,
Horrendum et dictu video mirabile monstrum :
Nam qua prima solo ruptis radicibus arbos
Vellitur, huic atro liquuntur sanguine guttae,
Et terram tabo maculant. Mihi frigidus horror
