Page:Viard - Grandes chroniques de France - Tome 9.djvu/82

Anglois oïrent ainsi parler la royne et il orent aussi veu leur seigneur naturel entre les bras sa mere, toute leur male volenté fu muée en douceur et en debonnaireté, et la reçurent li et son filz a grant joie et a grant sollempnité et ceulz qui estoient aussi en sa compaignie. La royne, ainsi receue a grant joie en Angleterre, ceulz qui l’avoient receue, signifierent au roy que sa venue estoit paisible, et pour ce, il li supplioient que il la vousist recevoir doucement, debonnairement et benignement. Le roy qui estoit obstiné en son courage ne prist pas en gré la supplicacion, ainçois manda à la roine par grant desdaing, qu’il li desplaisoit en toutes manieres de ce que elle avoit osé entrer en Angleterre a gens d’armes, meismement comme il la tenist et affermast estre anemie du royaume. Ces choses oyes, la royne se garda miex que devant ; et tant comme elle pot, elle aquist l’amour et la faveur des barons et des bonnes villes, especiaument de la ville de Londres. Si fu le roy si envelopé de mauvais conseil, qu’il avoit la royne tant abhominable, combien que comme sa preude feme fust aprouchiée de li pour adebonnairir son courage, se elle peust, que en nulle chose, ne en nul lieu, ne la voult oïr ne veoir, dont les barons d’Angleterre orent indignacion contre lui, et si grant, qu’il s’armerent avec monseigneur Jehan de Hainaut et alerent en guerre contre le roy. Meismes entre les autres fu pris messire Hue le Despencier, et le roy a pou de gens se retraist en i très fort chastel assis es marches de Galle et d’Angleterre. Et comme il alast de chastel en autre, ou vousist aler, il fu pris d’aucuns barons par force et par aguet, et fu baillié au frere au conte de Lencastre qui avoit seurnom de Tort