Jehanne, fille de messire Loys jadis conte de Evreux, a grant appareil et moult somptueux, fu coronnée à Paris en la chapelle le roy au palais[1].
En ce meismes an, la royne d’Angleterre Ysabel, suer du roy de France, qui se doubta se elle demouroit plus en France, que elle n’encourut la malivolence et l’indignacion du roy d’Angleterre son seigneur, prist congié à son frere le roy de France et s’en ala vers Angleterre. Quant elle se fu partie de Paris, elle chemina tant que elle vint à Pontigny[2], et ilec attendi nouveles de son seigneur et s’ordena à y demourer une piece.
En celle saison vindrent nouvelles au roy de France que le roy d’Angleterre avoit fait commandement, par tout son royaume, que on meist à mort touz les François qui estoient en Angleterre, et qu’il avoit pris à soy et confisquié touz leurs biens. Pour laquelle chose, le roy de France moult esmeu commanda que touz les Anglois qui estoient en son royaume fussent pris et leurs biens aussi ; laquelle chose fu faite en i jour et en une heure, c’est à savoir, l’endemain de la Nostre Dame en mie aoust. Si furent moult esbahiz les Anglois, et ne fu pas merveille, car il se doubtoient que aussi comme il avoient esté pris en i jour, qu’il fussent aussi en i jour touz mis à mort. Mais Dieu qui scet les choses mal ordenées ordener en miex, ordena tout autrement, car le roy fu enfourmé veritablement que
- ↑ La Chronique parisienne anonyme, dans Mémoires de la Soc. de l’hist. de Paris, t. XI, p. 103, § 150, ajoute que la reine Isabelle d’Angleterre et son fils Édouard y étaient présents. Cf. Thomas Walsingham, Historia anglicana, t. I, p. 179.
- ↑ Latin : « in comitatu Pontivi », dans le comté de Ponthieu.
