Page:Viard - Grandes chroniques de France - Tome 9.djvu/352

de trois lanieres, en chascune desquelles lanieres avoit un neu, ouquel neu avoit iiii pointes aussi comme d’aguilles. Lesquelles pointes estoient croisiées par dedenz ledit neu et pairoient dehors en un costez dudit neu ; et se faisoient saingnier en eulz batant, et faisoient pluseurs serimonies tant comme ilz se batoient, avant et après. Et ce faisoient en place commune en chascune ville où ilz estoient deux foiz de jour par xxxiii jours et demy, et ne demouroient en ville que i jour et une nuit, et portoient croix vermeilles en leurs chapeaux de feustres et en leurs espaules devant et derrieres. Et disoient qu’ilz faisoient toutes les choses qu’ilz faisoient par la revelacion de l’angle. Et tenoient et creoient que leur dite penance faite par xxxiii jours et demy, ilz demouroient purs, nez, quictes et absoulz de tous leurs pechiez, aussi come ilz estoient après leur baptesme. Et vindrent ceste gent en France, premierement de la langue thiaise, comme de Flandres, de Braiban et de Henaut, et ne passerent point Lille, Douay, Bethune, Saint Omer, Tournoy, Arras et ces marches d’environ les frontieres de Picardie. Mais assés tost après s’en esmurent pluseurs, et par pluseurs tourbes, de Lille, de Tournay et des marches d’environ, et vindrent en France jusques à Troyes en Champaigne, jusques à Reims et es marches d’environ ; mais ilz ne passerent plus point en avant, car le roy de France Phelippe si manda par ses lettres que l’en les preist par tout son royaume où l’en les trouveroit faisant leur serimonies. Mais non obstant ce, ilz continuerent leur folie et multiplierent en celle erreur, en tele maniere que dedenz le Noël ensuyvant qui fut l’an M CCC XLIX, ilz furent bien huit cens mile et plus, si comme l’en tenoit fermement. Mais ilz se tenoient en