Saint Omer. Mais ceulz de Furnes et de Bergues qui estoient moult grant gent et bons combateurs estoient issuz de leurs pays et estoient venuz à une liue près de Cassel, à une ville que l’en appelle Bambeque[1], et là distrent qu’il n’iroient plus avant ; car autrefoiz on les avoit menez jusques à Saint Omer, mais onques bien ne leur avint. Quant monseigneur Robert d’Artois ot ce oy, si prist coseil à ses chevaliers et à ceulz de Bruges, et puis s’en ala à eulz à Bambeque et parla à ceulz de Furnes et de Bergues, et leur dist que hardiement il venissent avant, car il estoit tout asseur de la ville de Saint Omer, et avoit jà receues II paires de lettres que si tost comme il venroient devant la porte, ceulz de la ville les lairoient entrer et li liverroient le duc de Bourgoigne, et de ce estoit-il tout asseuré. La meschant gent le crurent ; si firent que foulz et alerent avant. Mais il distrent qu’il ne passeroient ja le Neuf-Fossé[2] se il n’estoient mieux asseurez. Quant messire Robert d’Artois vit qu’il les metroit avant par telle voie, si en ot grant joie et fist tantost ses archiers courre par la terre d’Artois et bouter le feu. Quant le duc vit le feu en sa terre, tantost fist sonner sa trompete et issi ses batailles toutes ordenées hors de la ville. Et quant les archiers sceurent qu’il venoient, si s’en cuidierent raler, mais les gens du duc les retindrent et en tuerent[3] bien LX, droitement à un pas
- ↑ Bambecque, Nord, arr. de Dunkerque, cant. d’Hondschoote.
- ↑ Le Neuf-Fossé, ancien fossé séparant la Flandre de l’Artois, actuellement canal de jonction de la Lys à l’Aa (comte de Loisne, Dict. topogr. du Pas-de-Calais, p. 273).
- ↑ P. Paris, dans son édition des Grandes Chroniques (t. V, p. 390), a mis par erreur : « entrerent ».
