de chastiaux et de forteresces que l’en appelloit Senandone[1]. Au roy Edouart fu tout conté et dit comment il garnissoit et comment il occioit touz les Anglois qui venoient en sa terre. Il assambla tout son ost et se feri en Gales et chaça Loelin jusques en Senandonne et gasta et ardi tout le pays. Plus avant ne pot aler pour la montaigne qui estoit enclose de mareschieres et de paluz tout entour, et pour l’iver qui estoit fort et aspre. Ilec demoura et assit la montaigne et par mer et par terre ; et les Galois se deffendirent bien asprement et se ferirent par maintes foiz aus Englois, et en tuerent assez et emmenerent souvente foiz la proie au roy d’Angleterre. A la parfin les tint le roy si court que Loelin vint à li à merci[2] ; mais ce ne fu pas sanz grant perte de sa gent pour l’yver qui estoit fort et plain de pluie et de vent. Si fu acordé que Loelin auroit sa femme et que les hoirs qui estoient de lui ne seroient seigneurs de Gales aussi comme leurs devanciers avoient esté, et que Loelin seroit sanz plus tenu pour prince tant comme il vivroit. En telle maniere rendi à Loelin sa femme, et l’espousa en sa presence, et puis rendi, pour ce qu’il estoit clerc, Amaurri aus prelas d’Angleterre, et leur commanda le roi qu’il fust bien gardé et que s’il issoit hors sanz son congié, qu’il les puniroit et en soufferroient paine. Mais il fu puis delivré par le commandement l’Apostole, et vint en France demourer[3].
Page:Viard - Grandes chroniques de France - Tome 8.djvu/92
Le texte de cette page a été corrigé et est conforme au fac-similé.
