min et firent tant qu’il vindrent à Palerne. La cité de Palerne est le maistre siege de toute la terre de Sezille et la maistre cité ; et si dient aucuns que Meschines[1] doit estre le maistre chief pour ce que Meschines est plus riche et plus plaine de marcheandises et de gent. Ilec sejourna le roy xv jours entiers. Après ce, fu commandé que l’ost s’arroutast et se meist au chemin droit à Meschines. Tant errerent et cheminerent qu’il vindrent à Meschines ; si entrerent ou far[2] et passerent tout oultre a navie, et entrerent en la terre de Calabre et passerent tout oultre sanz sejourner, puis entrerent en la terre de Puille[3] et cheminerent tant qu’il vindrent à une cité qui a non Matrenne[4]. Si avint que madame Ysabel, femme le roy, passoit le fleuve qui estoit souz la cité sanz navie ; si là hurta le cheval sur quoi elle se seoit si forment, que elle tresbucha et chei à terre. Si se defroya et desrompi toute, et si estoit ençainte et toute plaine d’enfant. Quant elle fu dresciée, elle fu portée à une autre cité qui a non Cousence[5] ; et de la doleur et angoisse que elle ot, ala de vie à mort ; dont le roy fu moult dolent et courroucié, et touz les barons de France et tous les autres en furent troublez. L’en fist celebrer son service en grant devocion. Après le service, s’acheminerent et entrerent en la terre de Labour, et puis en celle d’Espaigne[6], et errerent tant
- ↑ Meschines, Messine (Sicile).
- ↑ Far, Phare ou détroit de Messine.
- ↑ Puille, Pouille.
- ↑ Matrenne, auj. Martorano, Italie, prov. de Calabre.
- ↑ Cousence, auj. Cosenza, Italie, ch.-l. de la Calabre citérieure.
- ↑ Il faut lire : Campaigne ; latin : « Campaniæ ». Cf. Rec. des Hist. des Gaules et de la France, t. XX, p. 485.
