assez viandes pour eulz soustenir ; ne ne pourroit en nulle maniere estre prise se ce n’estoit en traïson.
Quant Edouart fu arrivé, ceulz d’Acre alerent encontre et le reçurent moult honnorablement. Ilec demoura et sejorna près d’un an, et deffendi la ville des Sarrazins, tant comme il y fu avec l’aide de ceulz de la ville et de l’Ospital et du Temple, bien et souffisaument selon son estat ; car il ne fist onques chose de grant renom ne de quoy l’en doie faire memoire, qu’il ne pooit, a si pou de gens comme il avoit, issir hors des murs a bataille contre les Sarrazins, ne le soudan, [ne] contre ceulz d’Egipte[1]. Si comme il sejornoit en Acre, si vint à lui i Haccassis et dist que il vouloit parler à lui en secré. Si li fu mené en sa chambre ; si tost comme le Haccassis y fu mené, il cacha un coutel envenimé au plus couvertement qu’il pot et en cuida ferir Edouart droit au cuer[2] ; mais Edouart l’apperçut venir ; si se traist arriere et fui au cop au plus tost qu’il pot ; toute voies fu-il navré au costé[3]. Sa gent, qui entour li estoient pristrent le Haccassis et li tollirent le coutel, et le batirent et le trainerent parmi les chevex contremont le planchier en la sale. Si le mistrent en prison vilaine et oscure, et puis retornerent à leur seigneur et demanderent de quel mort l’en le feroit mourir. Si fu acordé qu’il seroit trainé et puis pendu, mais que l’en li demandast qui l’avoit là envoié. Et il respondi, le Viex de la Montaigne son seigneur et son maistre. De celle plaie fu Edouart malade
