En mer esmut et hasta touz les esperiz de tempeste et leur commanda qu’il se boutassent es nefs et qu’il les feissent souffler si forment qu’il pourroient. Tantost le vent se feri es ondes de mer et les commencierent à debouter si fort que ce sambloit que ce fussent montaignes qui vousissent monter au ciel. Le temps commença à noircir et oscurcir. Les maistres notonniers virent bien qu’il avoient tempeste ; si coururent aus gouvernaux et aus avirons et se commencierent à defendre des venz et de la tempeste au miex qu’il porent. Chose qu’il feissent ne leur pot riens aidier ne valoir, car les malignes esperiz se bouterent en maniere de torbeillons en leurs nefs ; si firent du pis qu’il porent en leur venue ; il rompirent les mas et les cordes, et les avirons et les gouvernaux firent voler par pieces en la mer. Les nefs demenoient quelque part qu’il vouloient ; aucune foiz les faisoient voler si haut qu’il sambloit qu’il vousissent monter aus nues, et puis les descendoient si aval qu’il sembloit qu’il vousissent descendre en abisme ; et en ce descendre, la mer entroit en leurs nefs en plusseurs liex et puisoient de toutes pars, et puis les faisoient courre si roidement que les quartiers et les pieces s’en aloient aval le vent. Les gens qui dedenz estoient perillierent et noierent en depriant à Nostre Seigneur qu’il eust merci et pitié des ames. Atant ne se tint pas Neptunus, ains envoia une partie de sa mesniee au port de Trapes ; si rompirent les cordes et les desancrerent, et les firent saillir parmi la mer aussi comme se il jouassent à la pelote, puis les faisoient retourner et hurler si roidement aus autres qu’il en faisoient les pieces voler ou il les desrompoient toutes. Une nef y estoit entre les autres qui Porte-joie avoit non, grant et mer-
