tant qu’il les embatirent es montaignes. Le roy de France et les autres barons virent les montaignes hautes et perilleuses, si ne vouldrent pas plus aler avant pour les armes pesans et pour le travail des chevaux, et pour aucuns aguez qui pooient estre es repostailles des montaignes ; si se mistrent au retour[1] et s’en vindrent par les tentes as Sarrazins ; si fu commandé que qui vouldroit aler au gaaing qu’il y alast. Tantost les gens à pié et les autres assaillirent les paveillons et les tentes et pristrent quanqu’il trouverent dedens, buefs et moutons, pain et farine, et moult d’autres choses profitables. Si trouverent des Sarrazins malades et enfermes qui ne pooient fuir aussi comme les autres, si les tuerent et puis bouterent le feu dedenz les paveillons ; si ardirent quanqu’il estoit dedenz demouré, neis les Sarrazins qu’il avoient occis furent touz ars. Les Sarrazins qui fuiz s’en estoient virent le feu en leur paveillons, si furent moult embrasé de courrouz et de ire, meismement pour ce qu’il savoient bien que leurs amis estoient mors et afolez. Quant les crestiens orent tout ars et destruit, si s’en retornerent droit à leurs herberges rengiez et serrez, dolenz de ce qu’il n’avoient point eu de bataille.
- ↑ Ici est omis un épisode de cette bataille rapporté par G. de Nangis : « Dum vero talia agerentur, quidam Sarracenorum inter ruinas murorum Carthaginis latitantes, cum vidissent aliquos nostrorum peditum pauperes et nullius nominis garciones inter nostrorum tentoria et Sarracenorum castra incaute discurrere, et lucri cupiditate armorum fragmina colligentes, irruerunt in eos et aliquos occiderunt. »
