Du roy Phelippe qui fu mort en l’an mil CCC XXI, vint en succession le royaume, sanz nul contredit, à Charles conte de la Marche, et fu coronné à Reins le dimenche de la Quinquagesime, c’est xxi jour de fevrier ; mais il ne vint à Paris devant le quaresme après.
[1]En cel an, avoit le roy d’Angleterre eu victoire de ses anemis, car le conte de Lencastre avoit esmeu pluseurs contes et pluseurs barons contre lui, combien qu’il fust son cousin germain, et s’efforçoient de lui desheriter, si que il avint que les gens le roy orent bataille contre eulz ; et fu occis le conte de Herefort et le conte de Lenclastre pris et pluseurs autres contes et barons. Le conte de Lencastre ot la teste coppée et les autres barons furent penduz.
Ci fenissent les faiz du roy Phelippe le Lonc. Après commencent les chapitres du roy Charles, son frere, conte de la Marche.
- ↑ Le récit de ces événements est donné avec plus de développement au chapitre ii du règne de Charles IV le Bel.
