ran de Marigny, procureur son pere[1], li avoit dit et promis. Car quant l’acort fu fait entre le pere, le roy et le conte, et li devoit assigner xiim livres de terre dedens le royaume ; et pour ce que il ne le fist pas, le roy reçut ces trois villes. Engorran y fu envoié et conseilla au conte que il les quittast au roy pour la dicte rente ; et il li donna esperance que il pourchaceroit envers le roy que il li rendroit assez tost de grâce especial. Et adonc cil le crut, et furent lettres faites de la quittance en telle condicion que elles ne seroient bailliées au roy tant qu’il auroit faite la dicte grâce. Engorran s’en retourna au roy et li bailla les lettres sanz li faire mencion de la grâce, et tint le roy ces villes comme seues propres. Pour ce, ne li vot le conte acorder nulle pais devant que il les reust, et le roy Phelippe fu courrouciez, et dist que il n’aroit jamais les dictes villes, et le fist ainsi jurer à son oncle et à son frere.
Et ce jour meismes, le conte se parti de Paris et se hasta d’aler avant que le temps d’aler fausist ; les procureurs des villes envoièrent après, et leur fu dit que il ne se partiroient de Paris tant qu’il eussent fait ferme pais au roy, et qu’il n’avoit chose en leur procuracion qui l’empeeschast, et qu’il savoient bien l’entencion de ceulz qui les avoient envoiez, et que s’il retornoient sanz riens faire, il n’avoient teste où il peussent mettre leurs chaperons. Quant le conte oy ce, si sot bien se les villes ne li aidoient que il seroit tantost desherités, si s’en revint à Paris[2], et fu la pais
