secont siege du concile en la grant eglise de Vienne celebré. Et là vint le roy Phelippe avec ses freres et ses filz environ la Mi Quaresme, et avoit moult grant compaignie de barons et de nobles hommes, et se sist le roi à la destre du pape plus haut que les autres ; mais il estoit plus bas que le pape ; et prist le pape son thieume : Non resurgunt impii in judicio. C’est à dire : « Les mauvais ne se relievent point en jugement. » Adonc le pape Climent, au concile general, l’ordre du Temple, non pas par voie de diffinitive sentence, comme il ne fu pas vaincu, mais par voie de provision et de pourvoiance du siege de l’Apostoile, quassa du tout en tout et adnulla yleques l’ordre du Temple. Ensement, en faveur et en l’aide de la Sainte Terre, fu ottroiée dudit pape Climent au roy de France le xe des eglises jusques à vi ans[1].
En cestui an, Henri roy des Romains, en la cité de Rome et en l’eglise Saint Jehan du Latran, de monseigneur Nichole du Pui cardinal d’Ostie et de ii autres cardinalz, du pape Climent à ce envoiez, de dyademe emperial fu coronné[2].
Et en ce temps, avant que le concile se partist, le siege de Rome pourveust, le roy et les prelas à ce consentans, que les biens des Templiers fussent devoluez aus freres de l’Ostpial, afin qu’il fussent plus fors à la Sainte Terre recouvrer.
