biens en une autre cité que l’en appelle Brixe[1], laquelle estoit moult fort. Quant ledit roy sot que les Guelphes s’estoient ainsi pour lui departiz de leur cité, si fist destruire toutes les maisons des Guelphes, et si fist abatre les murs de la cité et les forteresces, et par especial les portes de la cité qui estoient moult nobles, et si fist emplir touz les fossez en tele maniere que les murs et les fossés estoient tout à egal. Et après[2], se transporta ledit roy Henri en la cité de Brixe et ylec tint son siege depuis l’Ascension Nostre Seigneur jusques à la Nativité Nostre Dame. Si avint que ceulz de la cité se combatirent contre ledit roy des Rommains Henri. Si fu pris en celle bataille Tybaut de Brisach tout vif, lequel estoit capitaine de la dicte cité de Brixe ; lequel fu admené à l’emperere Henri. Quant il vit que il ne pooit eschaper de mort, si confessa publiquement que il et des greigneurs de la cité de Melan avoient fait moult de mauvaises conspiracions contre li et contre les siens pour li mettre à mort.
Quant l’emperere ot ce oy, si le fist trainer parmi l’ost et puis le fist pendre par ii heures, et puis le fist oster du gibet et le fist decoler et fist mettre sa teste sus une grant lance et la fist porter ou plus sollempnel lieu[3] de son ost afin que chacun le peust veoir, et le corps fit despecier en iiii parties et en iiii parties de son ost en fist porter en chascune partie i quartier ; et lors ot ledit emperere victoire de la cité, et fist destruire tous les murs de la cité. Mais endementres que
