ii costez, et fist i cercle, et fist ou milieu et entour ledit cercle le signe de la croiz, et dedenz ledit cercle fist entrer son cheval et son varlet, et se mist le dit convers à pié encontre le diable et li commença à dire moult de laides paroles et de reproches, et en la fin il li cracha ou visage. Lors le dyable mua ses grans oreilles en cornes, et sambloit que ce fust i asne cornu. Quant le convers ot ce apperceu, si li voult coper une de ses cornes et le feri ; mais son cop rebondi aussi comme s’il eust feru contre une pierre de marbre et ne li fist nul mal. Lors le varlet du convers dist à son maistre : « Sire, faites en vous le signe de la croiz. » Et adonc se signa ledit convers, et tantost le deable, en samblance d’un gros tonniau roullant, vers une ville qui estoit appellé Mollieres[1], qui assez près estoit d’ilec, s’en ala, et ne le vit puis le dit convers. Lors se prist ledit convers à cheminer, car il estoit jà jour cler, et s’en vint à son abbé au miex qu’il pot, lequel estoit à l’une des granches aveques autres abbés de leur ordre, et là estoit mandé le dit convers de son abbé pour disner avec li. Et là vint ledit convers assez matin et leur conta l’aventure qui leur estoit avenue. Si raconte cesti qui fist ceste cronique qui fu present quant ledit convers fist foy et serement devant les abbés de son ordre, que ce qui par avant est escript li estoit avenu en la forme et maniere que il le denonçoit. Et si tesmoigne cesti qui fist ceste cronique qu’il scet bien le lieu et qu’il vit le cheval qui par avant estoit paisible et debonnaire ; et depuis il estoit aussi comme tout impetueux et demi forsenés. Toutes
- ↑ Mollieres, auj. les Molières, Seine-et-Oise, arr. de Rambouillet, cant. de Limours.
