Page:Viard - Grandes chroniques de France - Tome 8.djvu/262

vauchoit en disant ses oroisons acostumées en lieu de matines et de heures, il vit devant soy aussi comme i grant arbre ou chemin par lequel il aloit, et li sambloit que ledit arbre venoit bien hastivement à l’encontre de lui. Adonc commença son cheval à fremir et estre aussi comme demi forsené, et par telle maniere que à paine le pooit-il mener droite voie. Et d’autre part, son varlet commença à fremir et à hericier, et avoit très grant horreur, en telle maniere que a paines se pooit-il soustenir sur ses piez ne après son maistre aler. Si commença ledit arbre à approuchier dudit convers et quant il fu i pou près de li, si li sambla qu’il estoit brun, aussi comme couvert de gelée blanche. Et ainsi comme il le regardoit, il va cheoir après li en telle maniere que onques ne toucha à lui ; mais très grant puantise et corrupcion dudit arbre issi. Lors apperçut ledit convers que ce estoit le deable qui li vouloit nuire. Adonc commença à appeller la benoite Vierge Marie le plus devotement qu’il pot. Si avint assez tost après qu’il se fu recommendez à Nostre Dame, qu’il commença à chevaucher moult lentement, comme homme espoenté. Si vit derechief le deable qui chevauchoit après li à son destre costé, et estoit environ ii piez près dudit convers en forme de homme, et ne parla onques à li. Adonc ledit convers prist en soy hardiesce et parla au deable, et dist en celle maniere : « Meschant ! comment es-tu si hardi de moy faire assaut en ceste heure que mes freres chantent matines et loenges, et prient pour moy et pour les autres freres qui n’i sont pas presens, Dieu et la benoite Vierge Marie, à laquelle ceste benoite journée de samedi est aprouvée ? Depars toy, car nulle partie n’as