les cardinalz, et dehors les murs au vespre revenans, les portes de la cité closes, chascun jour pourtracoient et delivroient quelle chose seroit miex à faire en si grant tourbe de choses. Mais comme il cuidast ylec trouver seur refuge et refuiement, si fu ylec de ses adversaires maintenant assis. Et quant ceus de la cité virent ce, si manderent aus Rommains que il receussent leur pape ; les quieux, quant il furent venuz, si fu tantost rendu et pris, et eust esté d’un des chevaliers de la Colompne ii foiz parmi le corps feru d’un glaive, se i autre chevalier de France ne l’eust contresté. Mais toutefoiz, de ce chevalier de la Colompne, en retraiant, fu feru ou visage, si que il en fu ensanglanté. Et comme il fu mené à Rome du chevalier le roy de France monseigneur Guillaume de Nogaret, si le servi humblement et devotement, auquel pape, l’en dit lui avoir reprouvé et dit en telle maniere « O tu, chaitif pape, voy et considere et regarde de monseigneur le roy de France la bonté, qui tant loing de son royaume te garde par moy et defent ». Duquel les paroles yce pape, après ce ramenant à memoire, comme il fust à Rome establi ou consistoire, la besoigne du roy de France et de son royaume commist à Mahy le Rous[1] dyacre cardinal, que selon ce qu’il seroit expedient et avenant, de la devant dicte besoigne, à sa plaine volenté ordeneroit. Et quant il ot ce dit, au chastel de Saint Ange dedenz Rome s’en ala et s’i reçut, et par le flux de ventre, si comme l’en dit, en
- ↑ Mahy le Rous est Mathieu des Ursins qui fut créé cardinal-diacre de Sainte-Marie in porticu par Urbain IV et mourut en 1306 (Ciacconius, Vitæ et res gestæ Pontificum romanorum, t. II, col. 163-165).
