fermerent les portes, et firent semblant qu’il avoient grant volenté de eulz tenir contre les François. Tantost la ville fu assise et tendirent leurs tentes le soir. L’endemain fu acordé qu’il assaillissent pour ce que l’en disoit que le roy d’Arragon estoit en la ville.
Quant ceulz de Pierrelate virent la grant puissance, si leur fu avis qu’il ne se pourroient tenir ne deffendre. Si atendirent tant que l’ost des François fu acoisié[1], si s’en issirent par devers les courtilz entour mie nuit, et bouterent le feu en la ville pour ce qu’il vouloient que les biens qui demourroient en la ville fussent perduz et ars et que les François n’en peussent avoir profit ne amendement. Les François virent le feu de leurs tentes ; si s’armerent dès maintenant et vindrent courant là où le feu estoit. Si ne trouverent qui de riens leur fust à l’encontre ; si pristrent la ville, si la mistrent en la seigneurie et en la puissance le roy de France. Endementres qu’il se contenoient ainsi, le roy de Navarre, le premier filz au roy de France[2], assailli bien et asprement une ville qui a non Figuieres[3] et la tint si court qu’il vindrent à sa merci, et il les envoia à son pere le roy de France[4] à faire sa volenté.
Quant Pierrelate fu prise et Figuieres, si fu com-
