bonne et alassent tous armez, à banieres desploiées touz près de combatre. Si entrerent premierement en la terre au roy de Maillorgue[1] frere Pierre le roy d’Arragon, qui se tenoit à la partie au roy de France et de sainte Eglise. Si tost comme il sot la venue, si s’en vint contre le roy au plus honnorablement qu’il pot et envoia ses ii neveus[2] à la ville de Parpignan, et leur fist honneur et feste grant.
Au roy d’Arragon vindrent messages en Cezille où il estoit, et li denoncierent que le roy de France venoit en son royaume d’Arragon a si grant gent que nulz ne les pooit nombrer ne esmer. Si dist à Constance que elle gardast bien le prince de Salerne et sa terre, et il iroit deffendre sa terre contre le roy de France. Il se mist en mer, si ot bon vent, si entra en sa terre, si garni les entrées par devers ses adversaires de gent et d’armes au miex que il pot. Quant Constance fu demourée, si se mist en moult grant paine de garder la terre et le pays et de savoir la volenté et le couvine de ceulz de Cecille. Si s’apperçut bien que ceulz de Cecille se reconciliassent volentiers à leur seigneur[3] ; si se pourpensa qu’il estoient plains de fausseté et qu’il n’estoient pas estables. Si fist metre le prince en une galie et l’envoia en Arragon, où il fu moult estroitement gardé une grant piece de temps.
- ↑ Jacques Ier, roi de Majorque.
- ↑ Les deux neveux du roi de Majorque étaient Philippe et Charles, fils de Philippe le Hardi et de sa première femme Isabelle, sœur de Jacques Ier.
- ↑ G. de Nangis est plus précis : « Sed quia Siculi principem Salernæ Karolum, quem captum tenebant, de urbe Messana ad quoddam castellum Siciliæ transtulerant, volentes cum ipso, sicut sibi dictum fuerat, reconciliari, timens Siculorum infidelitatem… fecit eum in terram suam Arragoniæ transportari. »
