le fist faire pour la grant amor qu’il avoit au beneoit martir et à ses compaignons. Et quant il l’ot fait faire tout nouvel, il le fist couvrir de fin argent pur sanz autre metail[1], et demoura ainssi couvert jusques au temps Challes le Chauve qui prist tot l’or et l’argent qui estoit en l’eglise, et la fist descouvrir pour les granz guerres qui furent en son temps[2]. Si estoient les voltes si viez et si corrompues qu’il estoient aussi comme au trebuschier, ne li abbés n’i osoit rienz renouveler pour ce qu’il avoit esté dedié presentement et en apert de par Nostre Seigneur Jhesu Crist. Ne l’en n’osoit le moustier refaire ne amender, pour ce que si haus sires, comme Nostre Seigneur est, l’avoit visité. Si s’en conseilla au roy de France, et li monstra comment la chose aloit. Le roy prist ses messages et les envoia à la court de Romme, et manda à l’Apostoile comment il vouloit que l’en feist tel besongne. Et l’Apostoile li rescrist : « Biaus chiers filz. Se Nostre Sires Jhesu Crist visita l’eglise pour l’amour du beneoit martir et de ses compaignons, ne fu s’entencion de parfaire le moustier pardurable et sanz nule fin. Et devez savoir que toutes les choses qui sont souz le cercle de la leune encloses sont corrompables ne ne pueent demourer en i estat. Par quoi nous vous mandons que l’eglise soit refaite en tel maniere que l’en i puisse Nostre Seigneur servir et honorer. »
Page:Viard - Grandes chroniques de France - Tome 7.djvu/98
Le texte de cette page a été corrigé et est conforme au fac-similé.
