donnoit solers selonc la mesure de leur piez, car elle estoit touz temps garnie de solers granz et petiz pour donner à ceus qui mestier en avoient. Et li meismes leur aidoit à chaucier, et puis si les convoioit et conduisoit tant qu’il feussent el chemin où il devoient aler. Quant les povres estoient repeuz et couchiez, la bonne dame prenoit sa sostenance avoec ceus de son hostel, ne ne vouloit avoir plus mestrise ne seignorie que les fames qui servoient les povres avoec li, fors tant que quant elle en veoit aucune trop lente ou trop pereceuse, et elle li conmendoit à faire son service, se cele n’i voloit aler, elle meismes i aloit pour servir et pour aidier aus povres tant qu’il feussent en liz couchiez. Car il avenoit souvent qu’il se levoient de leur liz par nuit pour aler à chambre ou pour faire orine ; si ne savoient rassener à leur liz se il n’i estoient conduiz et menez. Aucune foiz avenoit qu’elle n’avoit nul povre à servir, si comme entour tierce ou entour miedi, que il n’estoient pas venuz ; si s’en aloit seoir avoec les plus povres fames de la ville et filoit laine, et de ce file elle en faisoit faire dras dont les povres estoient revestuz. En povre habit se maintint puis le temps de la mort son seigneur, ne n’ot onques cure de cointise. Pour ce qu’ele amoit tant la povre gent, les dames du païz l’orent en grant despit et li tornerent le dos, ne n’orent cure de sa compagnie.
Le roy de Hongrie oï dire que sa fille estoit en trop grant povreté, si conmanda à i chevalier qu’il alast veoir en quel point elle estoit. Le chevalier se mist à la voie et vint droit au chastel où il cuida trouver la bonne dame et se heberga chiez le seignor de la ville, et demanda de la dame où il la trouverroit, et l’en li
