Après ce qu’il s’en furent partiz, le roy fist garnir le chastel de Niort et mena son ost à Saint Jehan d’Angeli. Ceulz de la ville, quant ils sorent la venue le roy se doubterent moult et pristrent conseil, et alerent au plus tost qu’il porent encontre lui, et se rendirent, et reçurent le roy et sa gent moult honnorablement en la ville. Le roy qui fu moult liez de la prosperité qui avenue li estoit, s’en parti au plus tost que il pot d’ilec et s’en torna vers la Rochele et l’assist le jour des ydes du mois de juing[1]. Il fist drescier ses engins partout devant les murs et greva trop forment ceulz de la ville. Més Savari de Maulion et iiic chevaliers et plusseurs soudoiers qui dedenz estoient, deffendirent et tindrent le chastel forment et viguereusement contre le roy et sa gent. Ainsi comme le siege et la guerre eust ja duré par xviii jours, il avint que le clergié et les religions, et le peuple de Paris s’esmurent et alerent sollempnelment, nuz piez et en langes, à procession dès l’eglise Nostre Dame jusques en l’abbaïe Saint Antoine, que Diex envoiast victoire au roy de France ; et furent à ceste procession iii roynes : madame Ysemburge[2] jadis femme le roy Phelippe ; madame Blanche femme le roy Loys ; madame Berengiere femme le roy Jehan de Jherusalem. L’endemain de ceste procession, avint si comme Diex le voult que contens et descort mut entre Savari de Maulion et autres chevaliers qui
- ↑ Il faudrait lire : juillet, soit le 15 juillet, bien que les Gesta Ludovici VIII et la Chronique de Tours donnent idus augusti, ce qui est une erreur, car la ville se rendit le 3 août (Rec. des Hist. des Gaules et de la France, t. XVII, p. 305, et t. XVIII, p. 305).
- ↑ Ingeburge, seconde femme de Philippe-Auguste.
