roy, il envoierent tout à Tunes, et fames et enfanz. Et pour ce que aucunes escriptures font mencion de Carthage, nous dirons la grant auctorité et la grant noblece où elle fu jadiz. Carthage qui est maintenant ramené à la semblance d’un petit chastel, fu anciennement une noble cité que la royne Dydo fonda, et estoit la real cité et la mestresse de toute Aufrique. Et furent cil de la cité jadis de si grant puissance, qu’il desconfirent par maintes foiz Romainz et assistrent par leur force. En la fin avint que les Rommainz la conquistrent ; mais ce ne fu pas sanz grant travail, car il i mistrent xl anz sanz cessier ; et mout y ot espandu grant foison de sanc. Avoec tout ce ne la porent il avoir à force, mès par cautele et par barat.
Quant Sarrazins qui avoient paleté aus François por rescorre la proie sorent que Carthage fu pris, si s’en retornerent. L’endemain[2] espierent que François estoient au disner ; si leur coururent sus si aspremenz qu’il couvint que les barons s’alassent armer. Quant Sarrazins les virent venir, si tornerent en fuie. Celle jornée meismes vindrent au roy ii chevaliers crestiennez de Cathelongne, de par le roy de Thunes, et li distrent que si il venoit à Tunes pour la cité assegier, que il feroit ocirre touz les crestiens qui estoient en sa terre. Le roy respondi que tant plus feroit de mal aus crestiens, et plus l’en vendroit.
