tentes le roy, et entrerent ens et burent le vin qu’il trouverent es bouciaus, et la pietaille qu’il i trouverent bouterent hors et ocistrent. Quant il orent beu le vin, il issirent des tentes et monterent seur leur chevaus, et si comme il aprochierent, il congnurent les banieres aus François et sorent bien que li Alemant estoient vaincu ; si fu leur joie tornée en tristece. Tantost se recueillirent ensamble et alerent rengié et serré à bataille contre le roy. Pour ce, ne failli pas cuer aus François ; si n’estoient il pas tant comme les Espagnos estoient. Quant François se furent reposez et il virent leur anemis si malicieusement et si serrez, si mistrent les hiaumes es testes et monterent es chevaus et les atendirent en la place où il s’estoient combatu. Erart de Valeri qui assez sot de bataille, qui près estoit du roy, si li dist : « Sire, noz anemis viennent sagement et si joins et serrez, qu’à poines porront estre percié. Dont, s’il vous plest, mestier seroit que nous ouvrissons d’aucune cautele à ce que il s’espandissent si que noz genz se boutassent en eus et peussent combatre main à main. » Le roy respondi : « Eslisiez de vostre gent ce qui vous en plera et faites ce qui vous soit profitable, et que leur bataille qui est fort et espesse puisse estre perciée. »
Erart prist xxx chevaliers preus et esleuz, et se dessevra de la compagnie le roy, ne ne fist pas samblant qu’il se vousist combatre, mès aussi comme s’il vousist fouir, et se hasta d’aler cele part où fuie apert estre plus seure. Tantost les Espagnols les escrierent à haute vois : « Il fuient ! Il fuient ! » Si se dessevrerent pour aler après, et ainsi François se ferirent entr’eus. Erart et ses compagnons retornerent arriere et se ferirent en euls d’autre part, grant cri et grant noise
