près de ses anemis, seur une petite riviere qui estoit entre les ii os ; ne ne sorent ce soir qu’il feussent si près les uns des autres. Quant vint à l’ajorner, que le temps commença à esclarcir, si que l’un ost pot veoir l’autre, Corradin et sa gent furent mout esbahi quant il virent le roy près, lequel il cuidoient estre loing. Tantost il coururent aus armes et s’apareillierent pour combatre, et ordenerent en ii batailles leur gent parmi le champ où il estoient logié. En la premiere fu dant Henri d’Espaigne, et issi premiers des herberges pour avoir la premiere bataille contre son cousin.
Le roy et sa gent qui mout estoient travaillié de la grant voie qu’il avoient fete, se dormoient en leur paveillons, ne ne cuidoient pas estre si près de leur anemis. Aucuns en y ot qui se leverent par matin et aperçurent l’ost des Alemanz qui ja estoient presque touz armez. Quant il virent leur anemis armez et ordener leur batailles pour combatre, il esmurent l’ost et crierent : Aus armes ! et se armerent tost et isnellement. Le roy qui la noise entendi se leva tantost et se fist mout bien armer, et monta seur son destrier et fist ii batailles de sa gent aussi comme Corradin avoit fet. En la premiere mist sa gent de Prouvence qui juques au jour de lors li avoient moult bien aidié ; et furent avoec euls cil de Champaigne[1] et de pluseurs autres nations. En icele bataille premiere, mist le roy iii chevaliers de France, capitaines et conduiteeurs de
- ↑ Cil de Champaigne, ceux de Campanie. Guillaume de Nangis dit : « ad supplementum legionis illius, Campanos, Lombardos et alios quotquot habuit barbaræ nationis voluit adhiberi ».
