avint que les traiteurs de Puille s’asamblerent et commencierent à murmurer contre le roy Karle, et firent esmouvoir des greigneurs du païs couvertement, qu’il ne feussent aperceu. Le greigneur mestre de celle assamblée fu dant Henri d’Espaigne ; et pour couvrir leur mauvaistié, il envoierent querre Corradin neveu Mainfroi et fiuz Corrat, à qui le reamme de Sezile devoit apartenir par droit heritage[1] ; mais il s’enfoui de Sezile au duc de Baviere son oncle, petis enfes, pour la paour de Mainfroi qu’il ne le feist occire.
Corradin assambla grant gent des plus puissanz hommes de toute Alemaigne et des meilleurs chevaliers. De ceste assamblée ne de ceste traïson ne savoit riens le roy Karle qui lors avoit assis la cité de Nouchieres qui se estoit revelée contre lui[2]. Dant Henri et Corradin savoient bien que le roy estoit enbesoigniez du siege de Nouchieres ; si entrerent en la terre de Puille et se tornerent par devers Sezile, pour ce qu’il cuidierent le roy seurprendre et qu’il le poissent miex desconfire.
De ceste chose vindrent nouvelles au roy Karle ; si se merveilla mout de ce que son cousin estoit contre lui. Quant il sot que ce estoit voirs certainement, il se parti du siege de Nouchieres et assambla tant de gent comme il pot avoir et ala contre ses anemis. Tant se hasta de combatre, que à paine donna il repos aus hommes et aus chevaus, et ala tant que à i annuitier il se loga
