Si ot si grant honte des garnisons qu’il avoit perdues qu’il n’osa retorner à son pere qui l’atendoit de jour en jour. Quant il l’orent enchacié au chastel, il assamblerent tout le pooir qu’il porent avoir et vindrent contre le conte Simon qui atendoit son fiuz et la gent qui estoient avoec lui. Et si atendoit le secors Henri d’Alemaigne[1], quar il li avoit juré et plevi qu’il seroit en s’aide et que ja à ce besoing ne li faudroit. Cil qui sorent que le conte avoit poi gent, alerent plus hardiement contre lui ; et estoit leur entencion d’ocirre le conte Symon et touz ses enfanz. A ce ne s’acorda pas Odouart, ançois leur pria qu’il feussent pris sanz ocirre. Simon sot bien qu’il venoient pour lui prendre ou ocirre ; si s’apresta contre eus à bataille, et furent avoec lui ses ii enfanz, Gui et Henri. Si comme il aprochoient de leur anemis, le conte dit à son fiuz : « Sachez, Henri, biaus fiuz que je morrai en ceste bataille. » Quant son fiuz l’entendi, si en ot grant pitié et li dist doucement : « Biax chier pere, alez vous en et sauvez vostre vie, et je soustendrai cest assaut en l’aide Nostre Seigneur. » « Biaus fiuz, ce n’avendra ja que je, ceste honte face, qui sui vieus et au terme de ma fin, et qui sui de si noble parenté descenduz, qui onques ne fouirent en bataille ; mès tu t’en devroies aler pour eschever ce peril, que tu ne perdes la fleur de ta jouvente, qui doiz estre successeur ton pere par prouece et par armes. »
Ne li uns ne li autres ne vodrent partir de la bataille. Le conte avoit grant fiance en Henri d’Alemaigne, quar il li avoit promis qu’il vendroit en s’aide a toute sa
- ↑ Henri d’Allemagne, fils de Richard de Cornouailles, roi de Germanie.
