loons et conseillons, et en la presence au devant dit nostre seigneur le roy, et par son commandement especial, nous arcevesque et evesque, avons promis en parolles de prouvoires. Et nous, contes et barons, avons juré sur saintes euvangiles que nous yceste paix, si comme elle est dessus contenue, et toutes les choses et chascune par soy qui sont en celle paix contenues, tant comme à nous appartient, fermement et establement tendrons et garderons, et que à bonne foy travaillerons et pourchacerons que nostre sires li roys d’Angleterre et si hoir, et toutes les choses et chascune par soy qui sont contenues en ceste paix, lealment acompliront et garderont fermement. Et cest sairement avons fait en la presence des messages le noble roy de France envoiez à ce de par lui et recevanz de par lui. Et en tesmoing de ceste chose, nous avons mis noz seaulx en cestes presentes lettres. Ce fu donné ou lieu et ou jour et en l’an devant diz.
Item, en celi temps, mourut l’ainsné filz du roy de France, avant ce que le dessus dit roy Henry d’Angleterre se partisist de France, ne que la chartre dessus escripte feust donnée.[1]Et trespassa à Paris, et aprés fu porté à Saint Denys en France, et fist l’en là le servise des mors devotement. Et aprés le service, ledit roy Henry d’Angleterre et les plus nobles qui là furent, pristrent le corps et le porterent parmy la ville de Saint Denys et plus avant, bien près de demie luye, et le soustenoient à leurs espaules. Et pour ce que si noble prince ne fust trop lasse, autres gens le pristrent
- ↑ Le ms. fr. 2813 reproduit dans la fin de ce paragraphe ce qui est donné plus loin p. 222 et 223 par le ms. de la Bibliothèque Sainte-Geneviève.
