jour de respondre de ce fet. Au jour qui fu assené, les barons de France s’assamblerent el palès le roy, et furent touz en l’aide au seigneur de Couci. Lors fist le roy venir le sire de Couci par devant lui et li commanda qu’il respondist au cas dessus dit. Li sires de Couci, par la volenté du roy, apela touz les barons pour lui conseillier, et il y alerent presque touz, si que le roy demoura presque tout seul. L’entencion le roy estoit de faire droit jugement et de punir d’autel mort comme il avoit les enfanz fait morir, sanz soi flechir.
Quant les barons virent l’entencion du roy, si furent tuit espoenté et corroucié ; si loerent au seigneur de Couci qu’il n’atendist pas jugement, ançois se meist du tout en la merci du roy. Les barons vindrent devant le roy et li prierent mout doucement qu’il eust pitié de son baron et qu’il en preist tele amende comme il voudroit. Le roy, qui mout fu eschauffé de joustice, respondi : « Se je cuidasse que Diex me seust aussi bon gré de lui justicier comme de lessier, maintenant morust d’aussi vilaine mort comme il fist les enfanz justes et innocens morir sanz cause ; ne ja ne fust leissié pour baron nul qui li apartenist. »
A la parfin, quant le roy vit les humbles prieres de ses barons, si se flechi et s’acorda que li sires de Couci rachetast sa vie. Si fu l’amende jugiée à x mile livres de parisis ; et avoec ce il demorroit en la Sainte Terre par l’espace de iii anz pour aidier la Sainte Terre à deffendre contre Sarrazinz à ses propres cous, et establiroit ii chapelles où l’en feroit le service de sainte Eglise pour les âmes des enfanz et pour toutes autres. Quant l’amende fu tensée[1] et jugiée, le sire de Couci se hasta
- ↑ Bibl. nat., ms. fr. 2813, tauxée.
