autre, present que l’en leur face, ne or, ne argent, ne benefice personnel, ne autre chose, se ce n’est pain ou vin ou fruit, ou autre viande jusques à la somme de x livres[1]. Et voulons que nul tant soit leur privé reçoive cortoisie en leur non ne pour euls. Et avoec ce nous voulons qu’il prometent par leur serement que ja ne feront present ne ne donront à nul qui soit de nostre conseil, ne à autre qui leur apartiegne, ne aus enquesteurs qui voisent pour enquerre de leur baillies ou de leur prevostez comment il s’i maintienent. Avoec ce il prometront par leur serement qu’il ne partiront à nulles de noz rentes, ou de noz bailliz ou de noz monnoies ne à chose nulle qui noz apartiegne. Avoec ce, se li baillif sevent souz eus prevoz ou maieurs ou sergenz qui soient rapineurs usuriers, nous volons qu’il perdent nostre service et qu’il soient puniz et corrigiez de leur mauvaistié. Et pour ce que nous volons que le sairement qu’il feront soit plus fermement gardé, nous volons qu’il soit pris en plaine assise devant touz, soient clers ou chevaliers. Nous volons et establissons que tuit noz prevoz, noz sergenz, se gardent de jurer vilain sairement en despit de Dieu et de sa chiere mere, et de geus de dez et de taverne soupeçonneuse. Nous volons que la forge de dez soit abatue par tout nostre reanme et que les foles fames n’aient meisons pour loier pour fere leur pechié. Et volons que noz bailliz ne cil qui sont en noz offices achatent possessions ne rentes qui soient en leur baillies ne en autre baillie, tant comme il soient en nostre service. Et se tel achat est fet nous volons qu’il soit mis en nostre main. Nous commandons à noz bailliz que tant
- ↑ Dix sols… en la sepmaine (Ord., t. I, p. 78).
