pleges. La cause pourquoi Ronmainz l’avoient en si grant haine, estoit pour ce qu’il estoit bons justicieres et droiturier, et justiçoit aussi le riche comme le povre. Le pape manda à ceus de Boulongne, par le conseil des Romainz, qu’il rendissent les ostages qu’il tenoient, ou il entrediroit Boulongne et tout le païs entour. Et il li remanderent que ja ne les rendroient pour chose qu’il seust fere ; ançois les feroient d’angoisseuse mort morir, s’il ne ravoient Branquelan leur citoien. Endementres que ce descort estoit entre Branquelan et ceus de Romme, Florent de Holande delivra le conte de Flandres et son frere de sa prison, en tel maniere qu’il auroit à fame l’ainsnée fille le conte de Flandres[1]. Et le conte Karle d’Anjou quita tout le droit qu’il avoit en Henaut[2] par une somme d’argent qui li fu livrée.
Une autre aventure avint à Romme, qu’il fu si grant tempeste et si grant esmovement, que la terre crolla si forment que la grant cloche de Saint Silvestre de Romme commença à sonner et les tours et les fortereces de la ville à trambler. Celle année que celle tempeste fu si grant, Richart le conte de Cornouaille[3] fu couronnez à roy d’Alemaigne par la volenté le roy d’Engleterre son frere.
- ↑ Béatrix, fille de Gui de Dampierre, comte de Flandre, qui mourut en 1296, trois mois avant Florent V.
- ↑ Par sentence arbitrale du 24 septembre 1256, rendue à Péronne, saint Louis ratifia le jugement de 1246 assurant le Hainaut à Jean d’Avesnes après la mort de sa mère (Lenain de Tillemont, t. IV, p. 24).
- ↑ Richard, comte de Cornouailles, fut couronné roi des Romains, à Aix-la-Chapelle, le 17 mai 1257 (Mathieu de Paris, t. V, p. 640). Cf. Lenain de Tillemont, Vie de saint Louis, t. IV, chap. ccclviii.
