vert de draz de soie à or batu. Par devant le tabernacle fu i autel dreciez qui fu aornez de chiers aornemenz. Devant cel autel estoit chascun jour célébré le service de la messe, fors les secrez qui apartienent au sacrement de l’autel. Après ce qu’il avoit oï messe, il aloit visiter les malades qui estoient en sa nef, et comanda qu’il eussent tout ce que mestier leur couvenoit pour leur maladies alegier.
Quant les voiles furent dreciez, les mariniers se mistrent à la voie et commencierent à cheminer tant qu’il passerent la terre de Chipre en mainz de iii jourz ; mès il furent en si grant peril qu’il cuiderent tout estre mort[1], car la nave le roy se feri à plain voile en une place areineuse et plaine de sablon qui s’estoit iluec endurcie si roidement qu’elle se debrisa forment. Lors commencierent tuit à crier à haute vois : « Ha Diex secorez nous » ; car il cuidierent que la nef feust toute froissiée outréement dessouz en la santine, ne ne sorent les mariniers qu’il poissent fere. Quant le roi vit ce, si douta forment le peril de la mer ; toutevois ot il ferme esperance en Nostre Seigneur. Il lessa la royne sa fame et ses enfanz qui gisoient touz pasmez et touz estordiz, et se mit en oroison devant l’autel, et pria Nostre Seignor mout humblement qu’il le delivrast du peril et tuit cil qui avoec lui estoient. Bien s’aperçurent les mariniers que Nostre Sires oï sa priere et distrent les uns aus autres, en leur langage, que c’estoit une bonne personne. Et la nef ala tous jourz avant si roide-
- ↑ Cf. Joinville, chap. cxxii et cxxiii et §§ 13 à 16 et 39. Geoffroi de Beaulieu, op. cit., chap. xxx. Voir aussi Guillaume de Saint-Pathus, Vie de saint Louis, éd. H.-F. Delaborde, p. 29 et 77.
