voloit metre la main pour la grant pueur qui venoit d’eus, quant le roy dit : « Enterrons ces beneois martirs qui miex valent de nous et qui ont deservi pardurable vie par le martire qu’il ont receu ». Dont les prist le roy à ses propres mainz à enterrer, si comme il les trouva gisant, detrenchiez par pieces et les metoit en son giron et les portoit aus fossez où l’en les enterroit ; n’onques ne s’en volt cessier pour male oudeur qu’il sentissent, jusques atant qu’il ne pot plus endurer en avant et qu’il fu lassez[1].
[2]Après ce qu’il fu retornez en la cité de Saethe, messagiers li vindrent de son reanme, qui li denoncierent qu’il retornast en France pour son païs garder et pour aucuns perilz qui porroient avenir en France par devers Engleterre ; quar li Englois estoient en grant aguiet comment il porroient grever France et prendre la terre de Normendie. Le roy qui entendi les messages s’en conseilla aus plus certains de son conseil et à ses barons ; si s’acorderent tuit qu’il retornast en France. A ce s’acorda le roy et lessa grant plenté de chevaliers avoec le cardinal, qui furent assez propres por deffendre et garder la sainte terre d’outre mer, et establi en son lieu i chevalier qui avoit à non messire Geffroi de Sargines, et commanda que tuit obeissent à lui aussi comme il feissent à son commandement, se il feust pre-
- ↑ Cf. Joinville, § 582, et surtout Guillaume de Saint-Pathus, confesseur de la reine Marguerite, Vie de saint Louis, éd. H.-F. Delaborde, p. 100 et 101.
- ↑ Cf. Joinville, chap. cxx ; Geoffroi de Beaulieu, Vita et sancta conversatio piae memoriae Ludovici quondam regis Francorum, dans Rec. des Hist. des Gaules et de la France, t. XX, p. 17.
