Quant le roy ot enclos de murs et de tornelles le Jafet, il envoia à Saete grant foison de gent por fere les murs entour la cité de Saethe. Si comme les maçons furent levez par matin pour leur jornées acomplir, Sarrazin les espierent et vindrent vers eus repostement. Cil qui garde ne s’en donnoient furent souspris ; si les ocistrent touz conques i seul n’en eschapa ; si estoient il nombré iiiim et plus. Quant les Sarrazins les orent touz occis, il passerent outre droit à la cité de Belinas qui adont estoit en mains de Sarrazins. Quant le roy entendi la nouvelle, si en fu forment corroucié. Tantost fist assambler son ost et l’envoia à Belinas[2] pour gaster la terre tout entour. Quant le roy ot domagié Sarrazins tant comme il pot, il s’en retorna arriere et vint veoir le domage que Sarrazin li avoient fet, et trouva les crestiens que Sarrazin avoient ocis, qui encore estoient sus terre, et estoient si puanz et si corrompus que ce estoit une grant merveille. Le roy en ot grant pitié en son cuer ; si fist toutes autres besongnes lessier pour eus enterrer et fist dedier la place et beneistre par la main du legat qui i estoit present. Quant la place fu dediée, les morz qui gisoient touz estendus sus le rivage de la mer furent enterrez ; mès nus n’i
