la royne le sot, si ot grant pitié du pueple qui si estoit tormenté de ceus qui garder les devoient et moustrer exemple et bonne doctrine. Si manda ses chevaliers et ses bourgois et les fist armer et se mist à la voie, et puis vint à la meson du chapitre où le pueple estoit emprisonnez. Si commanda à ses hommes qu’il abatissent la porte et despeçassent, et feri le premier cop d’un baston qu’elle tenoit en son main. Tantost comme elle ot feru le premier cop, sa gent tresbuschierent la porte à terre et mistrent hors homes et fames ; et les mist la royne en sa garde, et tint les chanoines en si grant despit, qu’elle prist tout leur temporel en sa main jusques atant qu’il l’orent amendé tout à sa volenté. Ne ne furent puis si hardi qu’il les osassent justicier, ançois furent franchis par une somme d’argent qu’il en doivent chascun an au chapitre de Paris. Celle joustice et mainte autre bonne fist la royne tant comme son fiuz fu en la Terre sainte.
L’abbé de Saint Denis en France fu en grant paine et en grant penssée quel present il porroit envoier au roy en la terre d’outre mer. Si li fu loé qu’il li envoiast froumages de gain[2] et que ce estoit une viande de quoi les barons de France avoient grant sosfrete. L’abbé
