ceus qu’il i trouverent, et puis tornerent à la Maçorre, et se desclostrent[1] et espandirent parmi le champ.
Quant les Sarrazins de l’Aumaçorre virent leur sote contenance, si pristrent force en euls et retornerent sus les barons et les avironnerent et enclostrent de toutes pars, et en ocistrent grant foison. Le conte d’Artois vit que les portes de la Maçourre estoient ouvertes ; si torna celle part entre lui et i chevalier du Temple[2], et se bouta dedenz la vile. Mais il fu tantost occis que onques pus ne pot l’en savoir qu’il fu devenuz. Celle jornée fu grieve et aspre aus barons, car Sarrazin leur lancierent quarriaus et seetes espessement aussi comme se ce feust pluie. Mès tant se tindrent jusque à heure de nonne, qu’il vainquirent l’estour et enchacierent Sarrazins du champ par l’aide des arbalestiers.
Quant Sarrazin furent chaciez du champ, les barons se recueillirent ensamble et mistrent leur trez et leur paveillons delez les engins aus Sarrazins qu’il avoient gaagniez. Iluec se reposerent le remenant du jour et toute la nuit. L’endemain[3] firent i pont de fust por venir à euls ceus qui estoient demouré de l’autre part de la riviere de Thaneos. Quant le remenant de la gent fu outre passé, si drecierent leur tentes entour le roy, et firent lices et clotures entour leur paveillons des engins aus Sarrazins, pour estre plus aseur. Nouvelles
