treu. Quant il furent acordé, le païs demoura en pais. Si avint en la cité de Coine[1], qui est la mestre cité de Turquie, que uns jouglerres jouoit d’un ours enmi la ville, devant grant plenté de Sarrazins et de crestiens marcheanz, en une place toute commune, où il avoit une croiz entailliée en i piler de pierre. Si comme l’ours aloit parmi la place, il torna vers le piler et pissa seur le singne de la croiz, et si comme il pissoit, il chai mort devant touz ceus qui le regardoient. Les crestiens commencierent à dire que ce vouloit Diex pour ce qu’il avoit pissié sus le singne de la croiz. Uns Sarrazins, qui iluec estoit, ot grant despit de ce que li crestien disoient que ce estoit vengence de Dieu. Si s’aprocha de la croiz et la feri dou poing en despit de Jhesucrist. Maintenant comme il ot ce fait, le bras et la main devindrent tout sec devant tout le pueple, si que onques puis ne s’en pot aidier. Uns autres Sarrazins estoit en une taverne près d’iluec ; si oï dire le grant miracle qui estoit avenu ; si sailli sus, touz desvez, et se feri parmi la presse tout outre, et commença à pissier contre la croiz et à dire : « Veez, ce fai-ge en despit des crestiens. » Si tost comme il ot ce dit, il chai mort en la presence de touz. De ce miracle furent mout lié les crestiens, et les Sarrazins furent dolent et corroucié.
Celle année meesmes que ces miracles avindrent, le
