qu’il trouverent en une fosse enchartrez. Si leur demanderent qui il estoient, et il distrent qu’il estoient crestien nez du royaume de France. Si tost comme il sorent qu’il furent François, il les mistrent hors des fers et leur donnerent à mengier, et puis pristrent conseil ensamble qu’il en feroient. Si respondirent aucuns qu’il avoient oï dire que François estoient bons combateeurs et hardie gent en fait d’armes ; si s’acorderent qu’il les feissent conbatre ensamble pour veoir la maniere que François ont en bataille. Si les firent très bien armer et monter sur ii chevaus, et puis leur commanderent [qu’il se combatissent l’un contre l’autre][1], et cil qui auroit victoire s’en iroit franz et quites là où il vodroit, et il promistrent que si feroient-il. Quant il furent entrez ou champ pour combatre, les Tartarins s’assamblerent pour veoir le tornoiement et leur contenance, et orent grant joie que il cuidierent que li uns oceist l’autre et qu’il s’entreferissent premierement de glaives et puis d’espées. Mais il le firent autrement ; quar il se ferirent en la greigneur foule des Tartarins et en ocistrent plus de xxx avant qu’il feussent pris. Par ces ii crestiens qui ne vodrent pas ocirre l’un l’autre, douterent puis forment les Tartarins les genz de France.
Quant les Tartarins furent i poi séjorné si se mistrent derechief au chemin et vindrent à une cité qui a non Cesare[2], qui siet en la contrée de Capadoce, et la pristrent et gasterent environ la terre et la con-
