Quant le roy vit le cop, il en fu forment corrouciez ; si fist tantost l’assaut reconmencier plus fort que devant. Lors alerent à l’assaut chevaliers et sergenz et assaillirent de toutes pars et bouterent le feu en la porte : les autres monterent sus les murs à eschieles, les autres monterent à cordes ; si ne porent cil du chastel endurer ; si fu le chastel pris et tuit cil qui dedenz estoient. Le filz au conte de la Marche fu pris, qui estoit bastard, et xli chevaliers et iv vins sergenz, et pluseurs autres dont il y avoit assez. Grant partie des prisonniers envoia le roy à Paris et les autres en prisons diversses parmi son reanme, et puis fist abatre toute la forterece du chastel et les murs trebuschier jusques en terre.
Après ce que Fontenai fu pris et conquis, le roy vint à i autre chastel qui a non Villiers[1]. Tantost comme l’ost vint devant le chastel, cil dedenz furent si esbahi qu’il ne porent metre conseil en eus deffendre ; si furent tantost tuit pris. Ice chastel estoit Gui de Rochefort, qui estoit de l’aide au conte de la Marche. Pour ce, le fist le roy tout abatre et geter en i mont.
D’iluec se parti le roy et ala à i autre chastel que l’en apele Prèe[2] ; cil dedenz ne mistrent onques deffensse en euls, si se rendirent. Tantost il alerent à i autre que l’en apele Saint Jelaz[3]. Si comme l’en vouloit tendre tentes et paveillons tot entor, cil du chastel manderent au roy qu’il les preist à merci, et il li ren-
