que le roy avoit greigneur force que son baron ; si apela ii homes de cors qui estoient ses sers et leur dist en conseil et pria que en toutes manieres il feissent tant qu’il enpoisonnassent le roy et touz ses freres ; et se il pooient ce faire, elle les feroit chevaliers et leur donroit grant terre. Cil s’acorderent à ce faire, et li promistrent qu’il en feroient leur pooir. Pour ce faire, elle leur bailla venin tout apareillié qu’il ne convenoit que metre en vin ou en viande por tantost metre à mort cil qui en mengeroit. Les sers se mistrent à la voie et vindrent en l’ost au roy de France et se commencierent à traire vers la cuisine le roy, et parochierent des viandes tant que cil qui gardoient les viandes les orent pour soupeçonneus ; si espierent qu’il vodrent faire. Si les prinstrent touz prouvez si comme il vouloient geter le venin en la viande le roy. Quant il furent prins, l’en demanda au roi que l’en en feroit, et le roi respondi qu’il eussent le guerredon et la desserte de leur present qu’il aportoient ; si furent menez aus fourches et penduz. Nouvelles vindrent à la contesse que ses ii sers avoient esté prins et penduz et pris prouvez de leur mauvaistié ; si en fu mout corrouciée, si qu’elle prist un coutel et s’en volt ferir parmi le cors. Quant sa gent li osterent et quant elle vit qu’elle ne pooit pas fere sa volenté, elle desrompi sa guimple et ses cheveus, et mena tel duel qu’elle en fu longuement malade au lit sanz soi reconforter.
de Beauvais, Speculum historiale, liv. XXX, chap. cxlviii. Sur cette tentative d’empoisonnement de saint Louis par Isabelle, cf. Lenain de Tillemont, op. cit., t. II, p. 441-442, et E. Boutaric, Saint Louis et Alfonse de Poitiers, p. 53, note 1.
