bons crestiens de la terre et contre la gent au roy de France qui estoient el païs pour garder la terre et la contrée. Mais quant il virent la grant multitude des renoiez, il envoierent messages au roy et li senefierent les granz vilanies et les granz assaus que li Aubigois leur faisoient. Quant le roy oï ces nouvelles, il manda missire Jehan de Biaumont et li commanda qu’il alast sus les Aubigois et que il ne tardast mie. Jehan assambla grant gent de chevaliers et de sergenz à pié et à cheval, et se hasta mout d’acomplir la volenté le roy. Si se mist à la voie et passa les mons de la Ricordane et chemina tant qu’il vint en la terre d’Aubigois. Tantost comme il fu là venus, il s’en ala à i chastel qui a non Mont Real et l’assist de toutes pars. Perrieres et mangonniaus fist geter et lancier, et tormenta si ceus dedens qu’il ne porent durer ; si li rendirent le chastel[1] et il le fist garnir d’armes, de gent et de viandes. D’iluec se parti et vint à i autre chastel et le prist par force ; mais ce ne fu pas sanz grant paine et sanz grant travail de sa gent. Quant cil du païz virent son grant pooir, si ne s’oserent plus tenir encontre lui, ainz chevaucha seurement parmi toute la terre. Quant il ot les Aubigoiz veincuz et corrigiez de leur mauvaistiez, si s’en retorna en France. Le roy fu mout lié de sa venue et de ce qu’il avoit eu victoire ; si le reçut lieement et li donna granz donz et li escrut sa terre et son fié.
- ↑ La soumission de Montréal eut lieu vers le commencement de novembre 1240 ; les principales villes prises dans le même mois sont Alet et Limoux.
des chartes, 2e série, t. II (1845), p. 363-379. Le siège de Carcassonne (1240), par L. Douet d’Arcq).
