s’en iroit toz li oz vers la cité por II choses : l’une si fu que se li jardin estoient pris, la vile seroit ausi comme declose et demie prise ; l’autre fu que il i avoit ja grant planté de fruiz toz meurs par les aubres, qui grant mestier auroient à l’ost, et por les eves qui de cele part couroient, dont li oz avoit bien mestier aus homes et aus chevaus. Li rois Baudoins commanda que ses genz se maissent dedenz les jardins ; mais trop i out grant force en aler par là, car derriers les murs de terre, de çà et de là des sentiers avoit grant planté de Turs qui ne finoient de traire par archieres que il i avoient faites espessement. A cex ne pooient avenir li nostre. Si en i avoit asez de cex qui se metoient tot apertement enmi la voie encontre aus et lor defendoient la voie ; car tuit cil qui pooient armes porter s’estoient mis hors pour garder a lor pooirs que noz genz ne guenassent les jardins. Il avoit de liex en liex, parmi les jardins, bones torneles et hautes que li riche homes de Damas i avoient faites por aus receter[1], se mestiers fut, quant il faisoient culir lor fruiz. Iceles estoient lors moult bien garnies d’archiers qui grant mal faisoient à nostre gent, et quant il passoient près de ces torneles l’an gitoit sor iaus de grosses pierres. Moult estoient à grant mechief ; sovent les feroit-on de glaives par les archieres des murs de terre qui estoient de çà et de là ; asez occidrent en tel maniere et homes et chevaus, si que maintes foiz se repentirent li barom dont il avoient empris à asooir la vile de cele part.
- ↑ Por aus receter, pour se retirer.
