[2]Corraz, li empereres d’Alemagne ot sejorné tot l’iver en la cité de Costentinoble, li empereres Manuel li ot assez fait maintes honors et granz compagnies, si com il aferoit à si haut home. Quant li noviau tens fu venuz, li empereres Corraz ot volenté de parfaire son pelerinage et à aler en Jerusalem. Li empereres Manuel li fit aparelier la navie tele comme ele avoit mestier à lui et à ses genz. Grant planté de riches dons li envoia au departir ; il entra en mer et si baron ovoc lui qui remés[3] estoient. Il orent bon vent, si que ne demora gueres que ariverent au port d’Acre[4]. En la vile sejornerent un poi, puis monterent es chevaus et vindrent en Jerusalem. Li rois Baudoins[5], li patriarches Fouchiers[6] li vindrent au devant a granz compagnies de barons, de chevaliers et de borgois. Li clerc furent revestu et le menerent a processiun dedenz la cité. Li poples le recut a grant joie.
En cele saison maimes, ariva au port d’Acre uns valanz hons dou regne de France, bons crestiens et de