destorbiers, por ce n’avoit mie talent d’emprendre nules guerres, juques a tant que il aust som pelerinage parfait. Après ce, il orroit volentiers parler le prince et les autres barons de la terre de Surie et par lor conseil feroit à son pooir le prou de la besoigne Nostre Segnor. Quant li princes oï que il ne feroit riens vers li de ce que il pensoit, trop en prist granz corrouz, et dès lors en avant tot le mal que il pot porchaça contre le roi, de lui corroucier se pena en totes manieres ; si nais que[1] la roine sa fame mist-il à ce que ele le vout laissier et partir de lui[2]. Maintes genz firent asavoir au roi que li princes li porchaçoit mal, si que il ot consel à ses hommes, celéement. Par lor acort s’en issi par nuit de la cité d’Anthioche, si que il ne le sorent pas tuit. N’ot mie tel procession au convoier com il avoit aue à l’entrer. Asez i ot de genz qui didrent par la terre que li rois n’avoit pas fait s’onor en partir ensi dou païs.
- ↑ Si nais que, si bien que.
- ↑ Les Grandes Chroniques ont omis ici un passage de Guillaume de Tyr relatif à la mauvaise conduite d’Éléonore d’Aquitaine : « Car elle n’estoit mie lors sage femme, ainçois fu mout blasmée en la terre, ne ne regarda mie, si com l’en dit, à la hautesce de sa coronne, ne à la foi du mariage. Li rois le li mostra bien, quant il fu retornez en France ; car il se desevra de lui. » Le texte latin de Guillaume de Tyr dit d’Éléonore : « quæ una erat de fatuis mulieribus », et plus loin : « Erat, ut præmisimus, sicut et prius et postmodum manifestis edocuit indiciis, mulier imprudens, et contra dignitatem regiam negligens maritalem, thori conjugalis fidem oblita » (cf. Recueil des historiens des croisades. Historiens occidentaux, t. I, 2e partie, p. 752-753).
