Page:Viard - Grandes chroniques de France - Tome 6.djvu/56

et mort de faim, si que li Tur les aprochoient por traire de près, puis s’en retornoient arrieres. Cil n’avoient pooir d’aus consuirre ; por ce les avironnoient de totes parz et traioient en aus ausi come au bersaut^[1]. Moult i navrerent chevaus et homes. Quant li nostre poignoient contre aus, cil s’apareloient tantost et fuioient arrieres, et quant il se retornoient vers lor pavelons, li Tur lor estoient tantôt aus talons tuit ensemble. En tel maniere dura tot ce jor cil hardaiz^[2], que trop i orent grant perte li chrestien. Li Tur n’i orent ainques ne perte ne domache. Grant chose avoit esté de l’ost l’empereor jusques à ce jor, car moult i avoit hauz princes, riches homes et bons chevaliers. Mais par la volenté Nostre Segnor ou par sa soufrance, fu lors si amenuisiez et sa grant valors abatue, que sanz tenir point de profit à la crestienté d’outre mer, por qui il estoient meu, furent iluec presque tuit gaté ; car si com il didrent, cill qui en echaperent, de LXX^m chevauchaors à haubers et de si grant compagnie de genz à pié com il i avoit, n’en echapa mie par tout la disieme partie. Li un morurent de faim, li autre d’armes, asez en pridrent lor enemi toz vis qu’il emmenerent liez. Nequedent^[3] li empereres eschapa et aucun de ses barons. A moult grant paine s’en retornerent arrieres vers la cité de Nique. Li Sarradin furent moult lié de la victoire que il orent ; asez guaenierent dedenz les tentes aus Tyois, or et argent, robes, chevaus et armes. Tuit enrichi s’en retornerent dedenz lor fortereces. Lor espies envoierent par tote

1. Au bersaut, au but.
2. Hardaiz, attaque.
3. Nequedent, néanmoins.