tion que li dux promist que il amenderoit au roi premierement ce que il s’estoit vers lui mesfaiz à jugement de sa cort, et après que il rendroit aus eglises et aus religions ce que il avoit pris dou leur par male raison, et que il en feroit plain restablissement, au dit et à la volenté le roi. Mais li rois, qui assez aguement[1] et assez cautelousement regardoit à la fin de ses besoignes, et apercevoit bien que malice d’ome estoit moultiplié en terre et que toute pensée estoit ententive à mal, eschiva le malice dou duc au porfit de lui et des eglises, car il avoit oï dire à mainz qui avoient conversé entor son pere, le roi Loys de bone memoire, que cist dux maismes l’avoit coroucié souventes foiz. Quant il estoit ajornez aus parlemenz pour ses meffaiz, il venoit à cort et prometoit amendement de touz ses torz faiz, et d’obeir aus roiaus commandemenz, et que dés hore en avant se garderoit de mesprendre. Et puis, quant il avoit ce pas passé et il estoit retornez en Borgoigne, si fesoit pis que devant, ne pas ne redoutoit à brisier son sairement ne à courroucier le roi son segneur. De ceste chose fu li rois garniz et entroduiz avant que la pais fust reformée. Pour ce, prist li rois III chastiaus très bons de lui par non de gages, par tel covent que il les devoit tenir tant que li dux eust rendue aus eglises la devant dite some de deniers ; c’est asavoir XXXm livres. Mais ne demora pas longuement que li rois ot debonaire conseil envers le duc, selonc sa debonaireté, et li rendi les III chastiaus que il tenoit de lui en gages[2]. Quant la pais fu ensi reformée, li rois retorna à joie à Paris en son palais.
Page:Viard - Grandes chroniques de France - Tome 6.djvu/169
Le texte de cette page a été corrigé et est conforme au fac-similé.
![](http://upload.wikimedia.org/wikipedia/commons/thumb/3/3b/Viard_-_Grandes_chroniques_de_France_-_Tome_6.djvu/page169-1024px-Viard_-_Grandes_chroniques_de_France_-_Tome_6.djvu.jpg)