soigne le roi porquoi il estoit là alez, congié prit à l’Apostoile ; si s’en retorna par Clermont. Là le prit une maladie moult griefe. Juques à l’abbeïe de Vezelai s’em vint à quelque paine, si malades com il estoit, por ce que il ne vouloit pas en ce point en estranges terres demorer, III jors devant la feste la benoite Marie Magdalene, dont l’eglise est fondée, vint là. En cele eglise avoit esté norriz d’enfance et pris i avoit l’abit de religium et faite professiun ; de cele maladie morut[1]. Après lui fu eleuz Hues[2] abbés de cele abbaïe de Vezelai. Ces choses avindrent eu tens de l’Incarnatiom Nostre Segnor M C LXII.
[3]Li devanz diz papes Alixandres s’aprocha de France, et le reçut li rois Loois et toz li roiaumes de France a segnor et a pastor de sainte Eglise. Et par l’exemple le roi Loois et dou roiaume de France, le reçurent a grant reverence, come maistre et pastor de sainte Eglise, maint autre prince come li empereres de Costantinoble[4] et cil d’Espaigne[5], li rois de Jerusalem[6] et li rois d’Angleterre[7], li rois de Hongrie[8] et li rois de Sezile[9], et tuit li roi chrestiem, fors soulement Ferris li empereres d’Alemagne[10] qui, selonc sa costume et daloiauté, s’en contenoit come forsenez. Toz jors
