meismes cas estoit corpables et à cui il avoit ja auques son meffait pardonné, eust le ieuz crevez.
[1]Quant li empereres vint à Es, il fu receuz moult honorablement du pople et de ses amis et d’aucuns chevaliers de France qui là estoient, et fu derechief de touz clamez empereor. Après ces choses, il ala orer à la sepouture son pere et rendi grâces à Nostre Segneur de touz ses benefices. Ses amis et ses prochains qui longuement avoient esté en pleurs et en tristece pour la mort de son pere reconforta, et se defaut ot aus obseques et au service, il le restora et rendi. Son testament fist reciter devant lui et vot que il fust tenuz entierement tout en la maniere que il ot devisé, et que chascune eglise metropole, c’est-à-dire archeveschié, eust sa partie du testament qui par nombre furent xxi. Les joiaus et les aornemenz qui especiaument aferoient à la persone de l’empereor lessa ou tresor, à li et à ceus qui après lui regneroient. Après ordena de ce que l’on donroit aus fiuz et aus filles de ses fiuz, aus neveuz et aus serjanz du palais qui son pere avoient servi. Après ordena de ce que l’on donroit aus povres communement, selonc la costume de crestienté. Ensi acompli et rendi tout le testament son pere entirement, si comme li escriz le devisoit.[2]La compagnie des fames qui trop estoit granz ou palais fist metre hors, fors aucunes qui furent retenues en la cort pour servir en aucuns offices[3]. A ses sereurs rendi ce que li peres
