gent et assegierent la vile. Touz ceus que il encontroient prenoient vis ou il les chaçoient en fuie. Mais tandis com il furent à ce siege, leur avint un meschief pour ce que il ne se tenoient pas si sagement com mestiers leur fust, car aucun des hardiz bachelers de l’ost venoient trop près des murs pour hardoier à ceus dedenz et de si près, que il parloient à aus et les lédenjoient[1], et leur lançoient javeloz et saietes ; et cil dedenz qui bien virent que il s’estoient trop eslognié de l’ost et que il auroient tart secors, orent moult grant despit de ce que il les lédenjoient, et pour ce meesmement que il estoient si poi de genz, les portes ovrirent et vindrent assembler à iaus, et cil les reçurent hardiement ; si en i ot assez d’occis d’une partie et d’autre. A la parfin se retraistrent cil de la cité, et li autre retornerent à l’ost. Longuement tindrent puis le siege devant la cité et moult i firent de domages, et quant il orent le païs gasté et leur anemis grevez de quanque il porent, il leur convint retorner pour le fort yver qui aprochoit. En Aquitaine vindrent au roi qui en ce tens se deduisoit en gibiers et en chaces ; si estoit ja la saison vers la fin de septembre. Grant joie ot li rois de la venue de sa gent. Tout cel yver demora en sa terre sanz ostoier.
- ↑ Les lédenjoient, les injuriaient.